文迪上訴失敗@泰地道

2009年10月26日星期一重陽節

今日又去咗SaSa度攻打四方城呀, 因乜事打得咁密呀? 咪就係文迪話要上訴囉! 芳芳話比次機會文迪上訴, 咁啱大家都得閒, 一於再開戰, 好可惜上訴失敗, 不過就無上次輸得咁多, 今次大輸家係主人家~~~SaSa! 我就贏咗$200大元, 又係贏少芳芳$100, 哈哈!

Lunch果餐我地去咗清真牛肉館食, 今次搭車好順利, 所以我早到呀, 先去攞位, 起初芳芳話同阿仔食完先嚟join我地, 點知阿仔唔陪佢食, 好彩我攞位果陣唔係好多人, 唔係就唔夠位就麻煩啦, 跟住文迪出現, 強哥又嚟埋, 好彩有人埋單唔係本來3個位點坐5個人呀! 好開心坐我隔離有位小朋友叫我做姐姐囉! 唔記得影相添!

Dinner文迪提議去黃珍珍食泰國菜, 我絕對無問題啦, 嚟到九龍城點可以唔食泰國菜喎! 後來劉生話黃珍珍又貴又唔好食, 叫我地不如試吓隔離呢間泰地道仲好啦!

咖喱海鮮脆包, 不嬲都鍾意食泰式咖喱, 所以覺得好鬼正,
可能無將個包攞去再焗, 一d都唔脆囉!

香辣炸軟殼蟹, 唔係太油, 食落知道係軟殼蟹!

沙嗲牛&沙嗲雞, 兩樣都超正, 我比較喜歡牛, 咬下又淋又多汁!
Yummy! Yummy!

炒什菜

菠蘿炒飯, 好多材料, 有魷魚, 蝦, 青口, 臘腸,
最體貼係另上的肉鬆和腰果, 唔會焗淋嘛!

 

因為狗舖太好生意, 劉生&劉小姐無嚟同我地一齊食, 所以外賣了炒金邊粉給他們作宵夜! 埋單前, 事頭婆還送給我們椰汁千層糕, 原來事頭婆識得SaSa, 所以有免費甜品呀!

 

泰地道
九龍城啟德道31號地下
2718 1088