2009年10月17日星期六
過著退休生活的SaSa, 如果狗舖唔使佢幫手就會約我地班舊同事去打麻雀, 今次有我, 芳芳&文迪, 本來約上星期的, 點知佢個女唔舒服, 所以取消了, 手痕的SaSa梗係唔會放過每一個機會啦, 今日又得閒喇, 我地3個梗係逢陪到底啦!
嚟到九龍城梗係要搵好野食啦, SaSa今期介紹去毓民私房牛肉麵, 毓民舊舖果陣都話想試, 到佢執咗我都無去試過, 旺角果間都無試過啦!
因為芳芳星期六都要開工, 所以只有我們3人去食, 約好1點鐘先去食過Lunch, 今日出門有點不暢順, 11點半準備出門, 落到樓下剛走了巴士, 呆等了15分鐘才有第二班車, 早知行去火車站無咁嬲, 激死! 去到火車站再來一班不載客列車, 又要等多2分鐘, 去到紅磡都已經1點鐘喇, 又見隧道口大失車就走去坐的士啦, 整乜鬼又大排長龍呀, 激鬼死我喇! 搭咗$40的士終於到達九龍城廣場, 因為唔係好知毓民間舖正確位置, 所以打電話問問文迪啦, 又比兩隻野點上點落, 遲到啫, 唔使咁玩我呀!
雖然係星期六, 呢度都唔係好多人, 地方都唔錯, 不過d侍應就唔係好掂囉, 想要加茶或點菜時, 佢地好似唔係好想理我地咁囉!
鹽酥雞, 好回味在台吃的呀! 呢個都OK!
涼拌青瓜普普通通啦!
當然唔少得牛肉麵啦, 有紅白蘿蔔陪襯, 好像飲梗青紅蘿蔔牛展湯,
牛展夠淋, 不過就少d囉!
呢個火腿蛋餅就麻麻地喇, 醬汁怪怪地!
菜肉餛飩湯又估唔到咁好味喎, 菜與肉比例剛啱我口味!
再來一個滷水三拼, 滷蛋好味, 滷豆乾好鬼硬, 滷海帶好奇怪!
毓民私房牛肉麵
九龍城賈炳達道128號九龍城廣場LG11A-11B
2716 1166
