開心復活節@柏晞失蹤事件簿

搞掂咗台北捷運之旅Blog喇！

終於可以寫返過去兩個月要回憶的日子喇！

 

２００９年４月１０日星期五

 

 

今次係第五次去迪士尼喇！不過都係唔使我出錢，因為大細妹一次都未去過，所以趁佢老公放假就帶埋兩個仔去玩返餐，順便請埋我地去喇，成員包括：老豆、媽子、浩倫、芍曈&Me。

一行９人分兩組出發，強少話要揸車去，但架車又唔夠坐喎，自己一家再加外父外母，都已經超載啦，我為有帶浩倫&芍曈搭公車囉！

芍曈最鍾意坐迪士尼專車，因為可以同佢鍾意嘅迪士尼銅像合照喎！

因為要搭公車，我地就要早一點出發，約定係迪士尼門口等，
我地三個都嚟過最少兩次，早到咗又唔知做乜好，都係影吓相先啦！

終於等到人齊喇，佢地第一次嚟，緊係要做例牌動作：

大門口照張相先啦！

今次門口呢隻花米奇ｄ色都算OK啦，對上幾次襯到ｄ色怪怪地！

平時最招積果個柏緯去咗邊呀？見到咁大隻鋼牙與大鼻就Dup晒頭！

柏緯：媽咪我好驚呀，我唔要同佢地影相呀！

見到心愛巴斯又唔同喎！不過都有ｄ怕羞喎！

柏緯：巴斯係我偶像嚟呀嘛！

我地都影番張大合照先得！

話咁快就到咗食晏時間喇！其實呢度ｄ野又唔係唔好味，係唔夠熱囉！

柏晞失蹤事件簿發生經過：

柏晞佢最鍾意係玩吹泡泡，唔係佢自己吹，係人地吹，佢去追&拍喎！咁迪士尼有ｄ車仔檔放咗ｄ迪士尼人物電動吹泡泡玩具係度，當然會開動吸引小朋友去玩&去買啦！柏晞見到非常開心，就走去玩泡泡，仲要玩到唔願走，佢老豆就格硬拉佢走，搞到柏晞發晒癲，LU晒地，好唔開心！跟住我地就去咗睇《米奇幻想曲》，柏晞&柏緯可能仲細，聽到音響咁大聲好鬼驚，話唔睇要走人，咁佢地一家準備走之制，咁啱工作人員宣佈機械故障，大家都無得睇囉！跟住經過《小飛象》，柏晞&柏緯又話未驚完又唔玩，淨係同隻唔識飛《小飛象》影相就算，影完相之後，大家都有ｄ攰，就坐係公園休息吓，就係呢個時候發現唔見咗柏晞喇！

娟（表情慌張）：老公，細佬呢？

強（左望望，右望望）：影相果陣都係度架！

娟（黑面＋緊張）：有無搞錯呀，影完相你無睇住佢咩？

強（驚驚地）：我以為佢仲同你一齊呀！

娟（眼帶淚光＋大叫）：細佬呀！細佬呀！媽咪係度呀！細佬呀！去咗邊呀？

大人就四圍搵，小人就坐係度等！

娟（眼帶淚光＋大叫）：細佬呀！媽咪係度呀！你快ｄ出返嚟啦！

娟（騰騰震）：死啦！細佬都未識講野，有好心人見到都幫唔到佢啦，比壞人捉咗就死啦！（望住老公）叫你睇住個仔都唔掂！

老豆笑嘻嘻抱住柏晞過緊嚟！

我：老豆帶咗細佬返嚟呀！

娟：有無搞錯呀，老豆你帶細佬去玩出聲嘛！嚇死人咩！

我：老豆係搵到細佬，唔係帶咗去玩呀！

娟（攬住細佬）：Sorry呀老豆，我驚得滯先至以為你係帶去玩無出聲咋！

老豆：無事，柏晞去返頭先玩吹泡泡果度呀！

娟：衰仔，想嚇死媽咪咩！（打咗兩吓PatPat）

強：衰仔，唔比你玩，自己走去玩咁醒！

虛驚一場！繼續遊玩！