和合石拜山 @ 邪邪邪

２００９年４月２６日星期日

 

 

每年清明或重陽，老豆都會約埋佢ｄ兄弟姊妹去拜佢阿爺＆父母，咁我地係佢仔女，緊係都要跟埋去拜吓我太爺&阿爺阿嫲啦！

但係就唔會揀正日去囉，因為太爺&阿爺阿嫲個墓地都好遠，係浩園後面山上，我地都會揸車上山，加上正日＆前後兩三個星期日政府都會實施封路，所以我地通常都會遲ｄ先去拜山！

我地諗住封路會遲ｄ去，人家都會諗到此一著，所以都係搞到大塞車，所以都唔明政府封路嚟做乜？

約咗親戚們九點半係我屋企樓下出發，五架車浩浩蕩蕩駛去和合石，點知車龍已去到林村迥旋處附近，真大獲！

 

 

十點半終於入到和合石入口，依然龜速行駛，大家都等到發吽豆，突然浩倫有所發現！

浩倫：BaPa你睇吓對面坑渠有舊野郁郁吓呀！（紅圈位置）

堅爺：邊度呀？

Ruby：有乜野呀？

卡旻ｅ：邊度郁呀？唔係咁邪呀!

芍曈：我又要睇！

卡旻ｅ：還定依家條車龍郁都唔郁，細佬你攞部相機去睇吓係乜嚟，影低比我地睇啦！

堅爺：好！你地等我影比你地睇啦！

好心急呀！我地係車睇到堅爺表情好古怪又尷尬，究竟郁郁吓果舊野係乜東東？

 

 

 

 

 

 

邪！邪！邪！

原來係青蛙交配呀！

 

 

 

最搞野係，跟係我地車尾ｄ人（其他親戚），個個都好奇我地做乜要落車影相，去到山上第一件事唔係拜山，係問我地攞相睇，個個睇完就－－－啋！啋！啋！

拜完山，我地就去咗雲泉仙館食齋喇！