SaSa搞乜鬼 @ 魚米之尊私房菜

2009年7月16日星期四

文迪早幾日話係網上搵到一間平價私房菜, 問我有冇興趣去試試, 究竟有幾平呀? $128 or $168唔知會有乜餸, 貴嘅多咗沙律同燕窩囉! 跟住再上OPEN RICE睇咗食評都OK, 我咁鬼死為食, 梗係想去試吓啦! 又見咁耐無搵SaSa食飯, 就叫佢約埋姊妹們一齊去試試魚米之尊私房菜喇! 點知SaSa話淨係得7月16日得閒, 打後到8月底都唔會出街喎! 嚇得我地成班姊妹死死吓, 究竟SaSa有乜事呀? 就連丹丹本來約咗人都要爽約出席今次突發飯局呀!

 

我地揀咗$128, 去到目的地就發覺原來我嚟過呢度食魚湯米線,
呢度根本就係茶餐廳間局, 可能老細見夜晚個市麻麻,
搞搞私房菜啦! 不過我就FEEL唔到私房菜喇!
似係酒樓食套餐, 沒有餐牌的套餐, 亦沒有很大的驚喜!

除咗指定飲品只可飲一杯, 其他都可以任飲, 不過飲冰就要加$3

1. 梅粉蕃茄仔
蕃茄仔個樣雖然係K型咗少少, 但咁樣配對又唔錯喎! I like it!

2. X菜
脆卜卜, 好得意, 幾好味!
如果有人知呢d係叫乜野名, 請比個答案我啦!

3. 拍青瓜
好鬼辣呀!

4. 鹵水雞腳
一人得一隻, 勁好味喎!

5. 章魚丸子配咖喱角
無乜特別!

6. 素刺身
感覺幾似, 食就無咩味道!

7. 豉油王中蝦
又係每人一隻, 蝦好新鮮, 味道唔錯!

8. 肉蟹蜆肉腐皮蘿蔔湯
用魚湯煮成, 加上有小許胡椒味, 甜中帶辣, 好正!

9. 蒜茸蒸青口
我唔鐘意食, 所以無食到!

10. 醬爆雞丁
味道OK, 不過雞丁真係太丁粒, 所以有好多碎骨!

11. 指天椒蒸魚鲛
魚肉好滑好鮮, 我食咗兩舊呀!

12. 酸甜素鰻魚
真係好似魚肉呀!

13. 咖喱豬扒包
用咗錫紙分開d咖喱豬扒, 唔使浸淋個包夠心思,
個包好脆好好味, 但係咖喱豬扒就好唔掂, 可能用咗鬆肉粉!

14. 芝士焗玉子豆腐
創意煮法, 太多芝士, 太膩喇!

15. 椒鹽沙猛魚
好新鮮, 好味!

16. 雙冬扒鮑片
清清地都唔錯!

17. 肉鬆四季豆
梗係無芳芳煮果d咁好味啦!

18. 蒜蓉蝦荷葉飯
d蝦雖然麻麻地, 但係調味得幾好, SaSa仲打包比劉生食呀!

19. 桂花紅豆糕
桂花清香, 中間加咗紅豆, 唔太甜,
我唔係幾鐘意食桂花都覺得好味!
幾想打包比Noel姐試吓呀!

最後梗係強哥幫我地姊妹們影番張合照啦!

原來SaSa無乜事, 只係佢姑奶會煮飯過佢食, 所以唔好意思出街食啫!
SaSa, 祝你健康快樂!
你而家咁瘦唔係好得呀, 食咗姑奶為你精心炮製美味菜餚,
就要肥肥白白再見我地班姊妹喇!

 

有樣野好得人驚, 我部相機唔知做乜鬼, 影咗d相有某部份無鬼咗!

 

 

註：由於並無菜牌提供, 以上菜餚名稱均為本人自己諗出嚟!

 

魚米之尊私房菜
旺角彌敦道613號飛達商業中心1樓
2148 9099
每位$128 / $168（免收加一）*只收現金