卡旻e ~ 每天都要過得開開心心 ~: 8月 2009

2009年8月31日星期一

第一次接觸@電動麻雀

2009年8月21日星期五

今日收到珞媽來電

珞媽：你今晚得唔得閒呀？

卡旻ｅ：有乜事可以幫到你呀？

珞媽：無呀, 想約你打麻雀囉!

卡旻ｅ：真係有腳打麻雀? 你唔好挑起我條根, 跟住話無得打喎!

珞媽：就係爭隻腳呀! 重要打電動麻雀呀!

卡旻ｅ：無打過電動麻雀喎!

珞媽：好好玩架, 打唔打呀?

卡旻ｅ：好呀! 我放6點喎!

珞媽：無問題啦, 放工一齊去啦!

卡旻ｅ：OK, 殺你!

珞媽：好, 一陣見!

卡旻ｅ：一於咁話!

第一次接觸, 好得意, 無咁嘈, 又快, 感覺真係唔錯! 不過佢地臨時想打麻雀, 因為太遲訂枱, 所以無房比到我地, 只在大廳間上屏封, 我們的位置還在關二哥前面呀!

11點半剛好打完8圈, 因為我要趕尾班車, 所以未計數就走先, 爭少少就搭唔到呀, 好彩走快兩步呀!

因為我淨係知道我係大贏家, 所以星期一返工就問佢地我贏幾多(HK$180), 剛好贏餐飯呀, 真係好, 有得食, 又有得玩, Happy! 贏咗錢梗係要請佢地食Egg Tart啦, 唔係下次唔預我玩就弊家伙啦!

金閣會 (豪華雀房)
灣仔駱克道191號京城大廈3樓全層 (港鐵站A1)
Tel.: 2827-1111

2009年8月28日星期五

與友相聚@夜上海

2009年8月20日星期四

今晚約咗3個朋友出嚟吹吹水, KY提議到尖沙咀海港城夜上海。我 & Kitty先約埋Maggie地鐵站等, 估唔到今次KY會先到, 我地3個搵咗好耐先至搵到呢間夜上海, 去到門口黑媽媽, 已經覺得好高檔(鄉下妹出城), 服務都唔錯呀, 兩個鐘內換咗四次碟呀!

相當貼心, 有小椅子相伴

杯&碟好別緻

極品XO醬, KY話佢上次嚟都食咗一大半, 門口有售$100/樽,
去嚟送飯一流, 不過我地齋食都食咗樽半呀! 回本呀!

泡菜：有點像韓國式的泡菜, 我覺得更好味！

生煎飽：夠juicy, 飽皮夠鬆, 個底又煎得香口! KY食咗兩個呀!

乾扁四季豆：汁夠濃味, 豆又煮得稔, 唔錯!

上海粗炒：雖然都好味, 但我就食唔出KY話果種, 食出兒時口味喇!

崧子雞米配叉子燒餅：祥記嘅炸菜肉末食得多, 呢個叉子就唔夠祥記正喇!
雞米係乜嚟呀?

煙燻小黃魚：唔係好夠煙燻味, 普普通通啦!

燻蛋：D蛋黃半生熟好靚, 一樣唔夠煙燻味, 比小黃魚好少少啦!

鎮江肴肉：有一入口即融化感覺, KY話超超超好食!!

醉雞：肉嫩酒香, 正!

蔥爆牛肉：呢個最差!

清晒枱面所有食品, Kitty & Maggie話無甜品唔夠完美, 但呢度又揀唔喎!
為有轉戰滿記啦!

KY佢減肥放暑假, 所以今晚食得最開心, 最開胃, 雖然係咁,
但去到滿記我 & KY都食唔落甜品, 我果晚飽到兩點都仲未瞓得著呀!

呢餐食咗$800左右, KY有張$100 Coupon, 每人平均都係$175, 值回票價!

夜上海
尖沙咀廣東道馬哥勃羅香港酒店6樓
2376 3322

2009年8月25日星期二

與企鵝齊溜冰

2009年8月18日星期二

浩倫話好想去溜冰, 咁啱睇到Blog友JJ剛剛與她兩個契女到圓方溜冰場編Blog, 問咗JJ一些資料後就決定帶浩倫&芍曈走一趟喇!

本來有一程巴士(270A)就可以到達圓方Elements, 但係諗過要成個幾鐘車程又好似長咗d喎, 搭港鐵到九龍站又要左轉右轉先至得, 後來諗起港鐵新開西鐵線, 東鐵線去到紅磡轉西鐵線到柯士甸站行十分鐘左右就到圓方, 都算方便啦! 起碼慳咗半粒鐘嘛!

十一點九去到, 玩到一點半, 佢兩個雖然攰到七彩, 但梗係玩到唔想走啦, 我又無份玩嘛, 齋同佢地影相都攰死我啦, 呢個商場d野又唔係好啱我喎, 下次早d嚟再玩過啦, 兩點前經濟d嘛!

回到家中........

浩倫：姑媽, 我PatPat好鬼痛, 想彎腰都彎唔到, 兩隻手臂又酸又痛呀!

姑媽：幫你揸d按摩膏就可以舒緩吓, 咁就無咁痛啦! 溜冰果陣見你跌完再跌都話無事, 而家返到嚟就話成身散晒! 下次仲去唔去呀?

浩倫：係唔係聽日再去過呀?

芍曈：我又要去呀!

姑媽：睇嚟你兩個真係好鍾意溜冰喎!

浩倫：係呀！

芍曈：係呀！好好玩呀, 有企鵝陪住仲好玩呀!

姑媽：叫爸爸星期日帶你地去過啦！

The Rink
香港九龍尖沙咀柯士甸道西一號圓方商場地下層
2196 8016
租溜冰鞋：$10/一對
租企鵝：$20/一小時
入場費：$0.6/一分鍾(10:00-2:00) $1.0/一分鐘(2:30之後)

2009年8月24日星期一

美食博覽大豐收

2009年8月15日星期六

好幾年無去過美食博覽, 今年文迪挑起我條根, 先約佢兩公婆&芳芳去瑞興中心果間鴻星食茶, 再過對面會展迫迫迫!

今年分咗幾個展館 - 美食博覽(展覽廳1及3E)、香港國際茶展(展覽廳3B-C)、國際現代化中醫藥及健康產品展覽會暨會議(展覽廳1A)、香港貿發局香港潮流精品展(展覽廳3F-G)

我地先去香港貿發局香港潮流精品展(展覽廳3F-G), 相信呢度會無咁迫!

BB涼鞋$60一對, $100兩對, 啱晒康荍著, 買!

趣智小文具$5一件, Cute, 柏緯一定鐘意, 買!

磨沙沖涼手套$10一隻至啱我呢d粗皮膚洗, 買!

行完潮流精品展(展覽廳3F-G), 就過隔離香港國際茶展(展覽廳3B-C), 無乜野茶咁使, 乜都買唔到, 跟落一樓國際現代化中醫藥及健康產品展覽會暨會議(展覽廳1A), 唔夠時間, 所以直去美食博覽(展覽廳1及3E)

明列子$30一包, 兩包$50, 加水攪暈就好似西米咁樣, 不過就多咗粒黑色物體,
脆脆地好得意, 加味就可以食, 隔離C9又想要, 平$5, 買!

正宗度小月古早味肉燥$50一罐, $90兩罐, 聽聞好好食, 同文迪一人一罐, 買!

黑橋牌牛肉乾$40一包, $100三包, 文迪要咗兩包, 抵呀, 買!

出前一丁米粉$50一套, 為咗個環保袋, 買!

鴻星脆脆銀魚$50六包, 臨走都係唔抵得, 買!

鴻星北海道毛蟹, 自從北海道食過之後就愛上牠, 舊年優質堂八折後都要$400,
呢度$140一隻, $250兩隻, 6點後$200兩隻, 未到6點已經減價,
Size都係細少少, 買!

賤物鬥窮人, 咁就使咗幾百蚊!

美食博覽
2009年8月13-17日
香港會議展覽中心
入場費$25

日式燒烤放題@蒲鍋日式燒肉火鍋專門店

2009年8月12日星期三

文迪話某日係九龍城廣場發現有間叫“蒲鍋日式燒肉火鍋專門店”日式燒烤放題好似好正, 返到公司就問同事們有冇興趣一齊去試試, 點知就連怎少同我地去威嘅Ken哥都有興趣喎, 仲話要請埋乖乖女Coey添, 你話點可以唔領情呀! 一行十人就向九龍城出發啦!

$148+10% - 2小時任食, 罐裝汽水都係任飲, 啤酒($26)就買二送一, 我地都要咗三支半, 因為有半支比店員打難咗! 每位送刺身拼盤, 都幾新鮮, 4位加送海膽刺身一板, 我唔係幾敢食, 佢地食過話OK, 8位再加送壽司拼盤, 都唔錯呀!

10個人都係得兩個爐, 雖然有好多野比我地燒都燒唔切啦! 燒烤食物種類都幾多, 我地燒過乜：主打霜降牛肉(2)、牛脷(2)、羊扒(2)、牛仔骨(2)、鴨舌(1)、海中蝦(2)、帆立貝(2)、鱔片(1)、吊片(1)、花枝片、魷魚鬚、多春魚、蟹柳、雞軟骨(2)、雞中翼(2)、雞腎(2)、五花腩、獅子狗、牛仔腸(2)、金沙骨、雞肉串、秋刀魚、栗米(2)、南瓜(2)、金菇、冬菇、雞肶菇, 差不多成張紙都比我地點晒, 所有要燒嘅食物都無調味, 燒果陣就要加D胡椒鹽&七味粉先至會好食, 文迪頭果幾round都無落味, 所以唔係幾好食, 我果邊燒果d就超正! 括號果d就係我食咗嘅份量喇!

食物雖正, 但環境就唔係好掂, 光線太黑, 燒焦了食物都唔係幾覺, 抽風系統&冷氣都唔夠, 煙霧迷漫, 越食越熱, 我都未試過飲兩罐汽水咁多呀!

蒲鍋日式燒肉火鍋專門店
九龍城賈炳達道128號九龍城廣場UG25-26號舖
2383 2822

2009年8月20日星期四

山形大栗拉麵@味千拉麵

2009年8月8日星期六

我都幾鐘意食拉麵, 但係上水果間味千拉麵唔知點解種係同出面果d無得比, 明明係集團, 點解可以咁參差?! 只係近期見佢出左一輯新廣告, 有一個山形大栗拉麵好似幾得意咁, 約埋大細細妹比就去試吓！

足足等咗半粒鐘, 我碗山形大栗拉麵先到枱, 大細細妹都已經食飽飽, 等都唔緊要啦, 天婦羅要炸嘛, 梗係會耐少少啦, 嚟到果舊栗米墨魚天婦羅係凍先比佢激死嘛!

湯：濃濃的栗米湯確係唔錯！

麵：依舊唔掂，太淋！

配菜：果幾條荷蘭豆唔知係咪有梗會靚ｄ呢！叫人點食喎？

栗米墨魚天婦羅：墨魚薄到食咗都知, 栗米又無乜味喎!

味千拉麵
上水龍運街8號新都廣場1樓106A室
2652 6683

2009年8月17日星期一

馬灣生態公園+挪亞方舟一天遊@下半場

2009年8月2日星期二

行程緊密, 9個字就要我地行完馬灣公園一定唔得啦, 跟團就係咁囉! 跟住就要再上旅遊巴士去東涌食午飯 - 東昇樓海鮮酒家

一圍十二人(7大5小)有八個餸+白飯任裝, 除咗生炒骨唔係好掂, 其他都比我地掃清, 同枱有個小朋友仲要掂個好味排行榜：
1. 金牌鹽焗雞 (好有雞味, 店主話係農場走地雞喎)
2. 炭爐燒味 (皮脆味正五花腩)
3. 白灼蝦 (新鮮又夠大隻, 唔似得上次係吉澳所謂海鮮餐)
4. 海三寶蒸茄子 (好特別, 海三寶：蝦乾、土魷、銀魚乾, 加埋豉油令茄子好正)
5. 椒鹽豆腐 (外脆內軟, 正正正)
6. 古法蒸海上鮮 (豉油帶出魚鮮味)
7. 北菇扒時菜 (冬菇肉厚, 生菜超甜)
8. 菠蘿生炒骨 (真係唔係好掂, 粉多又淋身)
小朋友真係好識食, 叻仔! 食埋自費($5)飯後甜品豆腐花又要返去挪亞方舟喇!

挪亞方舟

象徵「愛」與「生命」，透過一系列多元化設施及活動，宣揚方舟八大「愛」的精神：愛自己和他人、愛護身心靈健康、愛生命、愛環境、愛學習、愛挑戰、愛服侍他人。
挪亞方舟為企業、學校及各類團體提供一個回饋社會的平台，他們可贊助弱勢社群參加方舟不同的活動，更可安排員工、學生及義工參與服務，向社會展現愛心與關懷。

導遊話我地張入場劵可以入方舟多媒體博覽館&方舟花園, 我以為一張飛就可以行晒所有館添, 佢話襯而家人龍唔係太長, 最好先入方舟多媒體博覽館, 因為入到去有好多野睇呀!

方舟多媒體博覽館

在結合娛樂及知識性遊歷的多媒體博覽館中，展開一次震撼心靈的探索之旅，了解挪亞方舟對人類歷史及未來的重大奧秘 - 180度環迴影院內，親歷大洪水的威力；透過多艘來自全球的方舟珍藏模型，見證各民族的大洪水共同記憶；展示全港最大的太空隕石；珍貴動物組成的幻彩生命廊；讚歎大自然奇妙，同時明白地球面臨的挑戰，透過四維立體影院，得到人類命運的啟示。