台北捷運之旅 Day 1 出發喇！

２００９年３月２７日星期五

台北我嚟喇！

十年前與文迪跟團遊台北日月潭，２００４年與MingMing亦跟團遊過台北，這些固定景點實在太悶喇！今次又要多謝文迪安排這次行程，試過上次北海道自駕遊之後，感受到自由自在的樂趣，今次台北之旅雖然唔係自駕遊，搭捷運亦十分方便啊！

台灣觀光協會推廣2009旅行台灣年，只要購買台灣「機票+酒店」行程，四季好禮送給你！

1-3月送北高捷運儲值卡、4-6月送主題樂園優惠券、7-9月送台灣特產、 10-12月送溫泉券！

好禮數量有限，送完為止！

我地就攞咗呢張悠遊卡，價值NT$50

約咗文迪兩公婆& SaSa７點半係機場集合，預計搭６點８由上水鐵路站開出果班車，所以６點３就由家出發喇，大概四十五分鐘車程就到咗機場喇！今次又坐咗係賓賓隔離，驚住歷史重演，拿拿淋上樓上坐喇！

正想看看航班資料，文迪& SaSa就叫住我，佢地亦剛剛到步，人齊緊係去check-in先啦，因為文迪已在網上做了check-in，所以只要寄行李便可以，不用十分鐘就完成了，諗住順便造埋回程的check-in，點知櫃台姐姐話我地果張係特價套票，所以唔可以搞回程 check-in。

SaSa話要食早餐飲咖啡，我話一陣機上都有得食不如唔好食啦，但係SaSa係都要食，真係比佢激鬼死！最後係POPEYES買咗兩份早餐一齊食囉！

文迪SaSa去咗買早餐，見條龍咁鬼長，有排先有得食啦，我就過隔離Disney Store八吓，發現有特價品，$200可以買到一件衛衣＆一件短就T-Shirt，$40又可以有兩支原子筆，十分超值，仲有好多特價品，可惜時間有限，都係第一時間通知文迪SaSa，唔係比佢地話我有著數無佢地份就慘喇！未出發先破財，哈！哈！哈！話咗佢地知要快手ｄ揀，因為時間緊迫，我地以９秒９到達２號閘口，仲去埋廁所！

 

起機無耐就有早餐食喇，都話咗好快有早餐食啦！這個芝士火腿包又幾好味喎，麵包脆脆的！

大概個半鐘左右，就到達桃園機場，好多人第一時間就去換錢，驚死換唔到咁，我地就休休閒，文迪同佢老公就去咗買煙，SaSa & Me去廁所，跟住先去換錢!

（是日匯率：HK１：NT$４．２０７）

攞行李果陣有隻Dog Dog，見佢好鐘意追住ｄ攞住手抽袋嘅人，唔通要睇吓有冇走私肉？

跟住我地就出機場搵大有巴士買飛（NT$145）去君悅酒店，時間啱啱好，買完飛就有車出發喇！

大概一個鐘就到咗酒店門口，文迪兩公婆先去Check-in，我就去執執行李準備繼續行程，點知其中一間房可以上房先喎，緊係上房睇睇先，順便去個廁所先！

呢個唔知係乜水，有大班記者圍住佢，我都唔執輸影埋一份先！

有冇人知佢係乜水呀？

五星級酒店真係唔同ｄ，淨係大堂已經好Grand！不過出發前已經有好多人都話呢間好猛鬼，我唔敢話比文迪知，驚嚇親佢嘛！大堂有兩道咁大符咒，乜鬼咁嚇走啦，除咗ｄ鬼佬（外國人）！

上到房睇睇，又真係好靚好大，一ｄ都唔殘舊呀，係暗咗少少啫，住咗３日都瞓得幾好呀！

下一站：鼎泰豐

國泰假期套票計劃

3日2晚機票連住宿：台北君悅大飯店(Grand Hyatt Taipei) HK$2,239/人

續住每晚每人 HK$440

地址：台北市松壽路2號(近市政府站)

http://www.grandhyatttaipei.com.tw/

http://www.cxholidays.com/chl/zh/r/homepage 

機場稅+燃油費HK$309、台灣簽證費HK$55、旅遊保險費HK$98(AXA)