三五成群澳門兩天遊@第一天上半場

2008年10月24日星期五

 

自從睇過阿蘇&蔡瀾在節目裡介紹過的澳門美食之後，同事們都顯得十分雀躍，有見及此，大家便決定來個吃喝玩樂兩天遊，今次成員有文迪、SASA、芳芳、Joyce & 卡旻ｅ。不過就分兩組出發，我、文迪&SASA就約咗九點鐘係信德中心食早餐。

 

第一站 - 美心快餐食個豐富早餐，期間有個女人坐咗係文迪隔離，唔係咁邪呀，文迪咁都撞到熟人？

唔係！原來想sale船飛，七十蚊去氹仔，嘩！使唔使咁平呀！最衰我地已經買咗套票（係中旅社買，格蘭酒店＋二人來回Turbojet船飛，再送咀香園蛋卷一盒、漁人碼頭懷舊一條街刨冰兩杯及博物館入場劵兩張，不過入場劵送晒，所以今次無份，升級豪華客房，都係HK$1042，超值！）

 

$21

 

我地搭十點鐘船，食飽飽就即刻去攞位，過海關，向澳門出發！SASA就好啦，上船無耐就已入睡，我同文迪傾傾講講都好快到達咗澳門喇！

 

辦好入境手續，先到澳門旅遊詢問處攞張地圖，睇吓有乜車去我地目的地

東望洋炮台(包括聖母雪地殿聖堂及燈塔)，

搭12號巴士途經二龍頭公園，公園入口有觀光纜車直達松山山頂。

（纜車票價：單程 3 元，雙程 5 元。）

澳門巴士超抵搭，$2.5就可以走勻澳門島咁滯，真係搭到我地頭都暈！

 

天文台又話轉涼，呃人呀！點知上到山熱到我地死死吓，你地睇吓有幾熱！

 

搞到SASA猛話要飲汽水，順返條氣先可以繼續上山，終於上到山頂喇，又真係幾靚喎！

  

行咗一個圈就落山坐纜車去睇吓二龍公園隻黑熊，可能晒得滯，緣慳一面！

去片睇精華照片啦！

  

 

係時候食晏，發現對面街就係阿蘇介紹鬥辣果間咖喱文，一於就去試吓，

我地有勁辣王SA姨，怕你咩！

牛根米及牛腩米各$16，魚蛋、魷魚、菜$50，汽水$7

 

原來ｄ辣係自己加上去，對於我地SA姨來講，濕濕碎啦！

期間個伙計昅住我地部相機，又問我地好唔好用，影得靚唔靚，易唔易操作，

要幾多錢，見佢個樣咸咸濕濕咁，真係唔係好想啋佢！

埋單找數去搵禮記雪糕，問個伙計點去，竟然話唔識，都唔知係唔係我地唔多啋佢，所以唔話我地知，好叻咩，我地自己唔識搵咩！

，好彩個老細好人，走出嚟教我地點去！

 

行咗成十五分鐘右左，終於搵到禮記喇，終於可以食我細個果陣至食過嘅雪糕三文冶呀！

加埋杯菠蘿冰，消暑晒囉！

雪糕三文冶$8.5、紅豆冰&菠蘿冰各$11

 

收到Jocye短訊，佢同芳芳已上了兩點鐘班船，我地係時候去碼頭等埋一齊去酒店Check-in，諗住搭的士，等極都等唔到，為有一路行一路搵的士或巴士啦，經過一間內衣店，SASA話要買Barbar喎！比佢買埋先啦，終於搵到巴士站喇，點解兩三點時間都咁鬼多人搭車呀！迫鬼人咩！

 

 上半場完