三五成群澳門兩天遊@第二天

2008年10月25日星期六

 

一早就比文迪嘈醒，個傻婆話瞓得唔係幾好（緊係瞓得唔好啦，比SASA搶晒張被，又唔敢郁倒佢喎！），所以早ｄ起床去

。

見到窗簾有幾個"Lung Lung"，好搞笑，三星級酒店係咁上下啦！跟住SASA都醒埋，大家梳洗完就過705問Jocye同芳芳（佢兩個今朝幾點返呢？）攞張早餐劵落去食早餐，雖然個早餐無乜好食，但SASA都可以試食齊每款咁滯！

 

果兩隻野就繼續瞓，因為預咗十二點到官也街"山度士"食葡菜，所以由佢地瞓多陣啦，點知十點半左右果兩隻野走過嚟話去食早餐喎！

佢地食完早餐仲有成粒鐘先退房，所以買咗副啤牌玩鋤大Dee，大家玩到鬼剎咁嘈！

玩到夠鐘退房喇，向官也街出發，因為要去晃記買肉切酥比NatNat做手信，排晒長龍，所以就叫佢地先去尋找山度士。傳來壞消息，又係裝修呀，點解我地咁黑仔，為有轉投"木偶"，發生乜事呀，又係裝修！想走又唔走得住，因為肉切酥一個鐘頭後先有得攞，為有去"公雞"！

以前都唔使排隊，都係阿蘇累事！

終於影到三五成群喇！

蒜蓉包唔錯，加埋咖喱牛尾一流配搭！ 

炸蝦角唔係好掂，麵包包住隻蝦炸！

炒白菜都可以！

馬介休球，薯仔多過魚！

最最最最最唔掂，非洲雞，點解會係雪藏雞扒呀？

葡腸，越食越咸！

鹽燒沙甸魚，我無食，佢地都話麻麻地！

埋單，由於芳芳贏大錢，所以今餐由佢請，多謝晒！

 

由於芳芳要走先，我地就搭巴士到碼頭，擺低行李到儲物櫃，再繼續我地行程！

搭的士到義字街行吓出入口店，但係無乜荀貨執到喎，再去三盞燈食緬甸麵，但行到去又好似仲係好飽咁，大家決定搭的士去漁人碼頭食刨冰！

透心涼刨冰，正正正！

SASA以為有荀野執，原來一折都要成千蚊

處處有賭場，我地玩咗幾手，輸咗成舊水（緊係啦，跟本我地就唔識玩，搞到果兩個可官幾開心呀！）

 

夠鐘去手信街買手信同埋食晚餐，諗住食三元粥品，點知要七點先開門，唔理咁多，去到有乜就食乜啦！

比我地亂打亂撞去咗間聯記面家！

手信街入口有檔明記牛雜好鬼正！蘿蔔就好唔得！（$40）

韮菜爽甜，豬紅夠滑！

上湯鯪魚球好香滑，炸雲吞太多油喇！

雞腳菜好入味喎，不過同六記冇得fight喎！

加埋汽水，今餐食咗$102，抵呀！

返到香港先知阿蘇介紹係度食蝦子麵，唔怪得知個事頭婆係咁問我地食唔食啦！

 

最後我地搭早兩班船返香港！

 

第二天完