爵士拉麵@華仔救吓佢啦！

2008年10月4日星期六

 

 

今日約咗娟妹同柏晞去食日式拉麵

，食到娟妹一肚氣！

其實N年前佢都去過，話果度個事頭婆好鬼串，問我驚唔驚！

聽聞果度係日本人親自主理，又聽聞話好好味好正宗，

所以就去試吓囉！試完真係無下次囉！

 

 

我先到達，諗住入去攞位等娟妹兩個嚟，推門入去，

就有個買眼師奶問我幾位，我話3位，佢就即刻叫我出返門口等，

未齊人唔可以入，我話無問題，因為見佢間舖廿個位都唔夠，

我都唔好意思阻佢做生意，跟住就有個十歲左右細路"隊"個餐牌比我，

係"隊"呀，唔係"比"，唔係"遞"呀！

 

 

門口等緊期間，我見到有張告示就知點解佢地口咁串喇！

營業時間星期三至五12:00-13:30；18:00-20:30；星期六日做多半個鐘；

星期一至二休息再加不定日休息。

睇吓以下張相有10-12月營業時間，紅色係開舖日，藍色係休息日，

如果係出月薪就發達囉！

 

 

娟妹嚟到，入去坐低準備叫野食啦，個四眼師奶問我地攞單，

我"R"晒頭

，我都未叫野，問我攞乜單呀？我無單喎！

四眼師奶即刻叫我地出返門口等，要落咗單先可以入嚟，

點解唔可以坐係度落單呀？四眼師奶話佢未抺好張檯喎！

當時檯面好乾淨！娟妹死都唔出去，淨係企埋一邊等佢抺檯，

個細路就係咁叫娟妹出去等，娟妹都廢事理佢，

細路就黑晒面，啤住娟妹！

 

 

終於比我地入去喇！

四眼師奶：幾多位？（黑口黑面）

家姐：三位，兩大一細。

娟妹：兩個大得喇，BB唔食。

家姐：點解？（細細聲）

娟妹：呢度好麻煩，坐一個位就要收錢，每位最低消費$30！（細細聲）

家姐：嘩！搶錢咩！（細細聲）

四眼師奶：咁坐Bar檯（直角果兩個位，要我地抱住BB，唔比坐圓檯），食ｄ乜野？

我地仲諗緊（三十秒都無），

四眼師奶：叫快ｄ，唔係就要等好耐先有得食呀！

跟住就叫咗個細路（我估應該係佢個仔）幫我落單！

細路：食ｄ乜野（黑口黑面）

家姐：正想話要《雜錦拉麵》

細路：講Number就得啦！（好無禮貌）

家姐：一個細B4唔辣、一個細B5唔辣。

四眼師奶（再次出現）：小食要唔要，淨係落一次單，無得補單呀！

家姐：咁比多個煎餃子。

四眼師奶（擺低一杯茶，再擺低一個碟）：$117比錢先，呀！唔係$118先啱。

（跟住就同隔離位落單）

家姐：有冇計錯數呀？攞個計數機計吓先！

四眼師奶：無錯！茶錢每位$1，你地3個所以$3！

娟妹：BB唔食都收，唔係嘛？

四眼師奶：咁找多$1比你囉！

家姐（開始頂唔順）：仲爭一杯茶喎？

四眼師奶：麥茶嚟嫁，唔夠自己"jump"

 

B5 - 東京醬油湯底（豬骨濃湯）雜錦拉麵$34

 

B4 - 東京醬油湯底（豬骨濃湯）肥牛拉麵$54

 

煎餃子$27

 

 

舖面格局＋日本老闆親自煮麵好有日本風格，

麵都OK（無鹼水味），湯底應該有味精，因為我飲咗3杯茶（有味無色的麥茶）

但係ｄ服務真係頂唔順！完全無日本人禮貌！

今時今日咁嘅服務態度已經唔合時！

 

 

 

我明白點解佢地只可落一次單，

因為我絕對絕對絕對絕對絕對絕對絕對絕對絕對

絕對絕對絕對

唔會再嚟落第二次單！

 

如果你地受到氣就去試吓啦！