北海道賞花美食自駕遊2008@ Day 7 尋找觸摸動物園

2008年8月19日（續）

 

食飽繼續行程，向Northsafari Sapporo觸摸動物園出發，

都唔知係我地問題，定係Toyota問題，Miss GPS又帶錯路？

又要落車去問人，佢話我地駛過籠，返轉頭再搵啦！

終於見到指示牌，準備駛入去，點知有個阿伯走出嚟，

要我地放低500停車場費先比入，

嘩！仲要我地將架車泊到無雷公咁遠，我地駛返架車去入園位置，

佢就即刻要我地駛返入去，我地話要攞張簡介睇睇先，

同埋去個廁所先考慮入唔入園，

點知得個流動廁所，臭到死！

睇完張leaflet就覺得好似音樂農莊咁樣，要1000入場費。

Mingle：我無興趣，你地入啦！

卡旻ｅ：我都唔入喇，好似唔係好值喎！

文迪（扁咀）：你兩個唔入呀？

卡旻ｅ：你同你老公入啦，我地係車等你地囉！

文迪：唔好啦，咁不如走啦！

卡旻ｅ：唔緊要喎，山長水遠嚟到，幾經辛苦先搵到，

你又咁鬼鍾意小動物，你地入啦！

文迪（望一望老公）：點呀？

強哥：我地倆個入啦！

文迪（即刻開心晒）：咁我地兩個入喇！

卡旻ｅ：一個鐘後門口等你地。

文迪出來時笑得好開心，仲話入邊有好多佢地好鍾意嘅貓頭鷹呀！

都唔明點解要放隻咁大隻狗係正門，想嚇走人咩！

 

 

進入動物園第一關就係要入獅子肚喇！

 

今晚住番第一晚果間Sapporo Tokyu Inn，

文迪今晚想去【大漁居油屋】食雜錦刺身船，

我與Mingle噚晚先食完，所以唔去食，所以又各自搵食喇！

酒店對面就係狸小路，理所當然就在附近逛街啦。

我們先到某大廈的Bowling場巡視，Shopping完就可以碌碌ling。

藥房逛逛，寵物店又逛逛，地下街又逛逛，大多數店鋪8點左右就收舖，

最後去咗收晨早5點嘅【激安堂】逛逛，

原來這裡乜都有，衫褲鞋襪，家品電器，化粧品，超市，應有盡有，

又平又靚，早知淨係行激安堂就OK啦，行到累一累，

連Bowling都唔願去碌，明晚仲有機會嘛！

回酒店途中，就入咗間拉麵舖食晚餐，

我地下午果餐其實都未落晒肚，好彩呢間有分大細碗麵！

 

因為行得太攰，Mingle去咗藥房買咗包激辣浴粉，

回到酒店自製了一個激辣浸浴！