十二月份生日會@台灣麻雀＋新世紀潮館

2008年12月18日星期四

一年一度台灣麻雀實習班!

每年苑晴生日, 海銅、美珍 & 我多數會約埋打馬吊,

以前係打廣東牌, 近幾年因為苑晴已轉打台灣牌,

所以教我地打埋一份, 嘩! 真係好多規矩呀!

乜野兄弟呀, 姊妹呀, 十六不搭呀, 三相逢呀,

簡簡糊呀, 嚦咕嚦咕呀, 一般高呀.......

好多好多好多, 唔記得咁多,

我地三個唔理咁多, 有糊就叫, 食出先慢慢計,

無啦啦都會變咗三十番, 又幾盞鬼喎!

就係咁樣, 通常都係師傅苑晴一家輸三家喇!

好彩我地唔係打得大, 唔係就輸死佢喇!

打到六點零鐘, 就出發到旺角新世紀潮館食晚飯,

好彩有米雪攞定位等我地, 唔係就大獲喇,

我地去到幾鬼多人係門口等位呀!

好耐都無食潮州野喇, 以前公司團年飯都會去潮江春,

自從重組之後就無得食, 諗起都好回味!

荔芋香酥鴨好鬼正, 食過番尋味!

當然唔少得鹵水拼盤啦!

鵝片, 鹵蛋, 墨魚, 香腸等,鹵水味重d仲好d!

糖醋雙面黃, 兩面也香脆, 加糖加醋好鬼盞!

蠔仔粥足料夠鮮味!

梅醬炸排骨, 無我老豆整得咁好味!

芥菜排骨湯, 佢地飲得好滋味, 我就覺得苦苦地!

加埋甜品桂花糕 & 楊枝甘露, 完滿的一餐!

埋單前, 例行公事去廁所, 又發現咗一d野,

原來呢度係開放式廚房, 好有大排檔Feel呀!

又會咁鬼啱, 我地差不多食完果陣, 隔離枱埋單先過我地, 跟住坐低班人有兩個係公司舊同事, 佢地就係阿Kim & 忠哥, 阿Kim過嚟同我地寒暄兩句, 話佢又轉工, 類似自己搞果種, 我都無乜留意佢講乜, 因為私唔係好like佢!