北上尋歡．．．樂@覓食 (金光華廣場)

2008年11月28日星期五

 

Ken成日都話深圳依家好多正野食，搞到我地心郁郁！

有興趣姊妹們終於夾到日子出發，一齊北上尋歡．．．．．．樂！

強哥驚住佢老婆玩得太開心唔知時候返屋企，一於跟到實，唔好比卡旻ｅ帶壞！

芳芳&SASA上午要返工，約咗兩點三係上水鐵路站等，文迪&強哥都好準時，

例遲果個緊係丹丹啦，我地都預咗喇！

可能係星期五關係，話咁快就過咗關喇，我地先去唱人仔(HK$1:RMB0.871)，

然後就坐深圳地鐵到國貿站A出口　－　"金光華廣場"歎下午茶！

地鐵的單程票像一個籌碼，入閘時將籌碼"嘟"一吓就可以入閘，

出閘時就要將籌碼投入收票機內喇！

車箱好新好乾淨，仲有LCD賣廣告呀！

金光華廣場內大多數為高檔貨，絕對唔係羅湖商業城果種Style！

原先係去陶源的，點知佢無下午茶，真搞野！

為有過隔離"咸享酒店"，仲話兩點後點心有六折！

"飄香榴槤酥"係佢地三個先頂得順！

蒜泥白肉最恐怖，98%都係肥肉，睇唔出丹丹又鍾意食喎！

香芋絲春卷香脆，千絲蘿蔔酥一般啦！

豉油皇齋腸要番叮囉！

黑芝麻卷真搞笑，大中細都有齊！

雪白棉花盞，夠盞鬼，甜甜的無餡燒包！

日式千層糕，甜甜甜！

金牌流沙包，唔係幾流沙，但好香咸蛋黃味！

豉汁蒸鳳爪，不過不失！

排骨陳村粉，唔夠味，排骨好似食淨咁！

咸享鮮蝦餃，皮薄餡靚！

香煎墨魚餅，香嘖嘖！

生滾滑雞粥，滑滑滑！

 

埋單比人屈呀！不嬲我都唔係好check單，淨係數啱碟數就比錢！

就係咁樣出事喇，出門口果陣，比個男侍應叫住話我地未比錢，

我拿拿淋比張單佢睇，比咗142人仔，睇睇先發覺張單唔係我地張枱，

（睇張單都覺有ｄ奇，計我地4位茶錢，明明6個人嘛！

但收咗兩支青島啤，見銀碼差不多，所以無理到囉！）

櫃面果兩位小姐先至知搞錯咗，原來攞咗隔離枱張單比我地埋，

我地張單只係133人仔，仲要找番9蚊人仔呀！