趣味‧立體‧運動‧馬術館展覽@沙田新城市廣場

 2008年7月31日星期四

 

     

 

今天請了假和浩倫&芍曈到沙田新城市廣場行街+睇『趣味‧立體‧運動‧馬術館展覽』，其中一part係立體畫展。

因為浩倫上午9-10點要踢波&11-12點武術練習，所以要等他回家梳洗後才出發，順便約埋康荍媽咪食lunch。

 

電話響起來了！

康荍媽咪：「家姐你地同唔同我一齊食晏呀？」

家姐：「食呀，去名都德興茶餐廳好嗎？」

康荍媽咪：「好呀！先到先等位啦！我搞埋阿女ｄ野就出發！」

家姐：「

」（多數都係我地等佢地）

話咁快就到了茶餐廳！果然係我地到先！等位其間

浩倫：「姑媽點解唔食車仔麵呀？我想食豬紅油麵呀！」

姑媽：「車仔麵成家去咗日本旅行，休息9日呀！」

浩倫：「咁我食牛根米粉啦！

」

姑媽：「好呀，咁阿妹你想食乜呀？」

芍曈：「我要食麥當勞薯條！」

浩倫：「我都想食呀！我要食麥樂雞！」

姑媽：「嘩！你食得邊樣呀？」

浩倫：「咁我食麥樂雞，唔食牛根米粉喇！姑姐到咗喇！」

剛剛有位

家姐：「有位喇，你食乜呀？」

康荍媽咪：「午餐A，雞扒飯。

」

家姐：「幫你買咗先，然後去麥記，兩隻話要食麥記喎！」

浩倫：「我又去幫手買！」

姑媽：「快ｄ啦，唔係唔夠時間去沙田呀！」

康荍媽咪：「最衰我個女病病地

，唔係就跟埋你地去啦！」

家姐：「咪係，成個禮拜都唔好呀？」

康荍媽咪：「都唔知點解，

流完鼻水又咳

喎！夜晚仲喊到七彩呀

！叫咗老爺睇吓係唔係間屋有問題，佢又話無事喎，仲話我個女係神仙下凡，要摲仙根喎！

」

家姐：「咁都得？！

」

食飽喇！向沙田出發！

 

第一時間去睇吓幾點有得入場先，每場睇50分鐘，每場50人，入場前30分派飛，剛剛開咗場，要等下一場，不如我地去揀禮物

先啦，因為應承咗浩倫，如果考試在10名內就有禮物，所以就去咗玩具反斗城揀禮物

！

浩倫：「我想要大富翁」

姑媽：「好呀，不過要有冇人陪你玩呀？」

浩倫：「依家放暑假，姑媽你可以陪我玩嘛！爸爸媽咪阿妹都可以陪我玩」

姑媽：「好呀，咁就要大富翁啦」（正當浩倫興高采烈攞住盒大富翁之際，眼尾見到新出的高達模型，即時把大富翁放下，拿起高達模型。）

浩倫：「姑媽我又想要高達呀！」

姑媽：「無所謂呀，只可揀一樣，你自己諗清楚先啦！」（不到10秒，把高達模型放下）

浩倫：「我都係要大富翁，可以一齊玩嘛，我都有好多高達模型啦！」

姑媽：「阿妹你揀到未呀？」

芍曈：「我想要果套餐車呀！」

姑媽：「咁大套，你攞唔攞到先？」

芍曈：「攞唔到呀！好重呀！」

姑媽：「不如揀過份細ｄ啦？」

芍曈：「我想野食果ｄ呀，我鐘意煮野食呀！」

姑媽：「呢套生果疏菜好唔好？又可以切切切，好好玩呀！」

芍曈：「好呀！」

姑媽：「等我揀埋份積木比柏晞先，好比錢喇，我地唔夠時間睇畫展喇！」

浩倫：「多謝姑媽

」

芍曈：「多謝姑媽

」

 

 

時間啱啱好，又到派飛時間，我地又排四十幾，剛剛好睇五點零五分果場，仲有三十分鐘先入場，我地又去麥記食杯雪糕先。等到夠鐘入場喇！

浩倫：「姑媽，我要影呢張」

芍曈：「姑媽，我又要影呢張」

浩倫：「姑媽，姑媽，果邊呀，我要影呢張」

芍曈：「姑媽，姑媽，呢邊呀，我又要影呢張」

浩倫：「阿妹我救你，唔會比隻大河馬食咗你」

芍曈：「哥哥快ｄ走呀，鯊魚就嚟咬到你喇」

浩倫：「阿妹我地衝線喇」

芍曈：「好野，我地贏咗」

如是者，每幅畫都要影幾張，影到相機都無晒電，時間又夠鐘，兩隻嘩鬼都唔願走，猛話好好玩，下次再嚟過！

展期去到8月13日，想睇就趁早喇，我記得N年前都有立體畫展，大型好多，不過就要收入場費，都好值得睇呀！