二十年了！@回顧－見工編

2008年7月18日星期五

32℃ 

 

回想二十年前，在無心插柳下，進入了這機構工作，

當年在沙田TI（現在的IVE）畢業後，諗住玩吓先搵野做，

我同學就好心急，咁啱機構又請人，佢就寫信應徵，跟住就叫佢去見工。

同學D：「卡旻，我有得見工呀！」

卡旻：「恭喜晒，幾時去見呀？」

同學D：「星期三呀，你得唔得閒呀？」

卡旻：「得又點，唔得又點呀？」

同學D：「想你陪我去見工呀？」

卡旻：「唔係化(當年應該未興咁講)

，陪你見工？

咁鬼死遠，灣仔喎，邊識去呀？」（當年兩條友仔，最遠咪去旺角，仲話要過海！）

 同學D：「一齊去見啦？」

卡旻：「吓！我又無去應徵，見乜呀

」

 同學D：「去到先算啦，你帶定野去，到時一齊見啦！」(當時係請4個Data Entry)

卡旻：「怕咗你呀，去喇！幾多點呀？」

 同學D：「十點半要去到！」

卡旻：「嘩！使唔使咁早呀？快ｄ搵本地圖睇吓點去啦！」

 兩個鄉下妹就係咁樣第一次到灣仔見工喇！

 

見工當日約好在上水火車站等，坐火車到九龍塘，

再轉地鐵到旺角站，再轉去金鍾站，再轉到灣仔站，

再行五分鐘左右先到達目的地，差不多要成個半鐘，

轉到我地頭都暈

，又要睇住幾時要轉車，

驚住行錯路！ （因為甚少搭地鐵，所以好緊張搭錯線

）

同學D：「帶齊文件未呀？」

卡旻：「帶齊啦！灣仔區D office一定好靚喇！」

同學D：「應該唔錯，唔係咁遠都要去見工咩！」

卡旻：「好驚呀！唔知會考D乜啦？」

同學D：「Data Entry最多考我地打字，我地打字咁勁，唔使驚喎！」

卡旻：「係啫，都好緊張呀！」

同學D：「定ｄ啦，我去見先，你都無預約，都唔知會唔會見埋你啦！」

卡旻：「

」

同學D：「講吓笑啫！」

卡旻：「

」

 

 

 

終於到了目的地，上到十三樓（乜原來辦公室係咁樣，點解咁似工廠呀，

有人用緊部好大型中文打字機呀，好似打樁咁，又有人食住野四圍行，

又有人入緊信，原全唔同我睇劇集果種office呀！）搵接待處，問人事部係邊，

我地嚟見工，果位小姐就帶咗我地去見人事部小姐，同學D報上名字，

比咗張form佢填，我就同人事部小姐講，我無寫應徵信，

不過都對份工都好有興趣，可唔可以即時見工，

人事部小姐問我係邊度知道佢機構請人，我話佢聽係學校見到"聘請告示"知道，

就係咁樣，佢就比張form我填喇，填好張form，

等咗一陣就話要考我地兩個打字速度，

考完就有另一位小姐接見我地（見完同學D再見我），

唔記得問我乜喇，淨係記得問我會唔會再考過會考，

我緊係答佢會啦（不過到宜家都無再考過），

跟住就問我下星期一（7月18日）可唔可以返工，

我話無問題，就係咁樣，就做了廿年！