台北捷運之旅 Day 2 @九份

２００９年３月２８日星期六

 

驚！驚！驚！到九份！

 

今日原本行程預算係去「小人國」，噚晚經過商討，因恐怕雨勢太大影響我地到十分放天燈，所以改咗今日出發喇！

 

 

因為去九份及十分先要到瑞芳，所以今日要早一點起床，預留多一點時間呀！酒店沒有提供早餐，我地就諗住去到台北車站先搞掂我地早點喇！

行過酒店隔離果個市府廣場有好多牛牛係度，噚日話咗今朝要去八吓先，牛牛好特別，有唔同造型呀！

用鍵盤做的！

著旗袍的！

有介紹台北特色的－１０１及士林夜市！

仲有好多好多！

今日天色真係麻麻喇，１０１無咗三分一呀！

睇完牛牛，我地你時候去台北車站喇，先到市政府捷運站到台北車站，因為要轉火車，緊係要去買去瑞芳車票先啦！文迪搜集資料，預計買"自強"９點半左右班次，點知買票阿姨話無位喎，咁我地問佢幾點會再有車啦，點知佢話要三日後先有位，心諗大獲啦，咁我地行程點算好呀？後來文迪唔知搞咗ｄ乜野，阿姨話８點２５分有班車去瑞芳喎，拿拿淋買飛啦，當時已經８點２０分喇，仲唔快ｄ，唔通要等三日咩！（SaSa又話肚餓，又話要去廁所，我就幫佢四圍搵廁所，但係搵唔到囉，跟住就聽到文迪叫我快ｄ上車喇！）後來先知有唔同車種去瑞芳，真係虛驚一場呀！

大概一小時車程，終於到達瑞芳車站，我們先到補票處購買"平溪線一日週遊劵"（NT$54），這張劵可以即日無限次往來瑞芳至菁桐各站，因為預算到菁桐、平溪及十分，所以購買這張劵方便又慳錢！

由於雨勢好像越來越大，雖然噚晚買了一把縮骨傘（NT$99），諗諗吓都係買多一把直傘（NT$80）穩陣ｄ！（兩把我都有帶返香港呀，哈！哈！哈！）

買完傘就搭的士（NT$180，唔係睇錶收費，係公價嚟呀！）上九份喇，點解我會話－－－驚！驚！驚！到九份！

因為我係揸數負責人，所以我坐車頭，我見到個司機揸住碗飯嚟開車，你知啦，幾年前九份發生件大車禍（我果年就係發生意外後去九份，諗起都好鬼驚，去九份條山路九曲十三灣，當時個導遊仲指比我地睇意外現場同埋架唔似旅遊巴嘅物體！）今日仲落住雨又大霧，有乜依郁無碌竹比我地揸住嘛！好彩個司機上山前將碗飯食完先，咁都安心ｄ！

唔使１５分鐘就到咗九份老街喇，因為未食早餐，緊係第一時間搵牛肉麵食啦，我話上次導遊介紹果間幾好食，記得好似係街尾，邊行邊搵啦，越行越有ｄ唔妥，點解行咗成５分鐘都搵唔到間牛肉麵舖呀？

卡旻ｅ：點解唔見咗呀？

SaSa：係唔係執咗呀？

卡旻ｅ：可能係呀，無理由行咁耐都唔見嘛！

強哥：頭先落車就見到有間牛肉麵舖，不如去果間食？

卡旻ｅ：係咩，我無留意到呀，返轉頭食啦！

我地就係咁樣就嘥咗３０分鐘先食到碗牛肉麵喇！最慘係，果間就係我想去果間呀！可能上次唔係呢邊落車，所以我成日形住係街尾，激死人呀！坐低先叫炭燒台灣香腸（NT$30），實在太肚餓，連相都無影到呀！跟住就有好多香港團經過，每個導遊都話呢間牛肉麵係最好食，我地更加肯定係我地要去果間喇，最重要係，成條街根本就無第二間係買牛肉麵囉！點會唔係最好食係呢間呀！

跟住我地都食咗唔少野：

上左：阿婆魚丸（NT$40）－－我最鍾意最大果粒福州魚蛋！

上中：舊道口牛肉麵（NT$90）－－千其唔好叫牛肉湯麵呀，係無牛肉食！

上右及中左：花生捲冰淇淋（NT$35）－－將花生糖刨碎放係春卷皮上再加兩球雪糕捲起即成，喜歡可加香菜！

中中及中右：鹽酥菇（NT$50）－－有天下第一菇之稱，又確係幾好食喎，都唔係菇！

下左：薯山傳（NT$40）－－我地要咗咖喱味，香港長洲都風摩一時呀！

下中：一口酥臭豆腐（NT$20）－－一ｄ都唔臭，加埋ｄ酸菜一齊食仲正！

下左：阿婆芋圓＋薯藷圓（NT$40）－－SaSa話無食過，一定要試喎，QQ的，但我就覺得麻麻地喇！

九份給我的印象是有一點懷舊的感覺，在這裡出現這間舖總覺有點格格不入啊！

食飽飽＋遊覽完，又係時候向菁桐出發喇！我地當然又係坐的士返回瑞芳車站啦！

驚！驚！驚！驚！驚！驚！離開九份！

又係的士司機呀，今次仲驚過嚟果陣呀！我地見到架的士比其他大部，以為會舒服ｄ啦，錯呀！越坐越心寒呀！開車無耐我發覺個的士司機得一隻腳呀！我唔係歧視呀！係佢ｄ行為嚇親我地呀！

的士司機：你們從哪裡來的？

卡旻ｅ：香港。

的士司機：來了多少日？

卡旻ｅ：剛來了兩天。

的士司機：現在往哪裡？

卡旻ｅ：到平溪放天燈。

的士司機：今天天氣不好，放天燈不成，只能放到五六樓高，不如我帶你們到別的地方玩玩？

卡旻ｅ：不必，我們已購了車票。

在我們前面有一輛私家車，私家車前有一輛旅遊車，因為天雨路滑，他們都正在慢駛。

的士司機（有點不耐煩＋響安）：他們的技術真差，一點膽子也沒有，不會超車的嗎？

卡旻ｅ（心想）：你唔好亂嚟喎！

的士司機（更加不耐煩）：不要少看我（拍拍自己大脾），沒有對頭車的話，我就可以超車了！

卡旻ｅ（心想）：你真係唔好亂嚟呀，仲想我地包你車遊覽，我好想依家就落車喇！）

話口未完，佢真係超車呀！仲要超兩架呀！

卡旻ｅ（心想）：唔落雨行呢條路已經覺得唔安全，何況落緊雨呀，的士大佬唔好玩野啦！

的士司機：看到吧！我說我的技術了得，他們一點也比不上我！

卡旻ｅ（心想）：你神經病！

終於到達目的地喇，九秒九比錢落車，我驚我心臟負荷唔到呀！

下一站：菁桐