２００９年１月２６日星期一
年初一有乜好做喎？緊係去逗利是啦！
孖寶兄弟第一家到訪，好醒目，入屋即向公公說：
新年快樂！身體健康！
兩兄弟見到有部夾糖機，緊係第一時間爭住玩啦！
柏緯：姨媽我夾到呀！食唔食得呀？
姨媽：假野嚟呀，唔食得呀！（其實係真，不過唔想又食到咳！）
柏緯：細佬，假嫁，唔食得嫁，唔好食呀！
跟住就係表妹到喇！
表妹仲有個半月就一歲喇，著住中國服好得意呀！
呢個衰妹好黐媽咪，老豆都唔係成日可以抱到佢，
今日好鬼乖喎，個個有比抱吓，不過就唔可以太耐囉！
每年等齊人，我地就會影張全家福留念，但係今年影唔到呀！
表妹第一年過新年，佢爺爺嫲嫲要帶佢返鄉下見吓ｄ親戚，
等唔切表哥同表姐呀！
浩倫&芍曈因為要去佢媽咪個婆婆度拜年先，要三點幾先嚟到，
所以我地就去飲茶先！
時間啱啱好，我地飲完茶返到屋企，浩倫一家剛回來，
浩倫：爺爺，心想事成！嫲嫲，身體健康！
芍曈：爺爺，橫財就手！嫲嫲，新年快樂！
肯定係佢阿媽教定佢兩隻點講啦！
五隻嘩鬼都係著中國服，最衰夾唔啱時間影全家福啦！
跟住有乜好做喎，大人打麻雀，小朋友就打機囉！
哈哈！比我贏咗＄２００，都算發咗新年財啦！
２００９年１月２４日星期六
食盤菜？去酒樓？自助餐？
經過一輪磋商，最後都係在家吃！
左思右想後，終出了九款菜餚
炭燒豬軟骨、蒸海班、牛脷炒椰菜、蓮藕章魚豬骨湯、
白切雞、百寶鴨、瑤柱炒豆苗、髮菜蠔豉炆海蔘、豉油王蝦碌
最想講就係呢隻係美心MX度買番嚟嘅百寶鴨喇，一定唔會有下次！
本來諗住係食"蓮香"至出名果隻百寶鴨，一星期前訂貨已經話瀑晒！
見到美心MX又有出品，就去幫襯吓喇，完全兩回事，
味道原全唔及蓮香果種香，內裡的餡料超級咸！
最重要係仲貴過蓮香喎!
蓮香$198，美心MX$238（仲要係DBS優惠價）
做乜四條友仔掛住睇電視，飯都唔食呀？
原來做緊勁歌金曲季選，仲要係佢地成家人偶像攞獎呀！
農夫～舉高隻手
呢條友仔仲離譜，飯又唔食掛住打機，仲要打到瞓著咗！
２００９年１月２３日星期五
終於收到金水為我做的不織布XO喇！
金水手工好正呀！
叮噹系列仲加正呀，有興趣可以去佢個Bolg睇睇呀!
http://hk.myblog.yahoo.com/iam-goldwater/index?l=f&id=6
2009年1月23日星期五
在公司過鼠年最後一日喇，例牌食團年午飯！
每年的菜譜都是這樣的，沒有一點新意！
開飯前都係例牌玩吓遊戲先，都係果ｄ啦，揮春Bingo，今次得到獎呀！
黃金桔蒟蒻一盒有十條，都唔夠一圍分！
比我抽到枱獎喎～$50百佳Coupon!
跟住就頒發長期服務獎喇，哈！哈！哈！傻吓！傻吓！傻吓！咁就廿年喇！
當然唔少得抽獎時間啦，今年又有我份呀，不過最衰唔係咁啱駛喇！
我地圍枱都唔錯呀，有2/3人都抽到獎，雖然無抽到大獎，但係都好開心呀！
佢地抽唔到獎，我就將我果份分咗比佢地，等大家都有禮物帶返屋企嘛！
十五年、廿年、廿五年，我地做咗福祿壽！
鹿鼎記～小祥子
祝各位牛年快樂！身體健康！萬事如意！心想事成！
