2009年@第一個工作天

2009年1月2日星期五

唔好以為老細放假就可以放鬆吓，原來唔係！

佢放假前就交低晒要做呢樣要做果樣，呢樣又話要出，果樣又話好趕！

如果唔係張6仔唔生性，我就唔使咁慘啦！

好彩今日有人請食Lunch，心情都好D！

本來訂咗去富臨飲茶，點知去到先知我地個Booking No.唔係我地喎！

問個阿姐咁點先，我地五個人明明有訂位，依家又變咗無位喎！

個阿姐忙到七彩，淨係叫我地等等，大姐呀！Lunch Time九百幾人等位，

要等到幾時呀？我地為有轉馱啦！阿Ken以9.8秒跑去喜萬年，

叫佢個契妹比張枱過我地，嘩度又係鬼死咁多人，好難有位喎，

最後佢個契妹比咗員工尾枱食飯個位置過我地，如果唔係都唔知等到幾時！

好似文迪佢地咁，訂咗枱都等咗成半粒鐘先有位，到時好多點心都無啦！

花姐仲搞野，訂咗枱又遲到喎，人家緊係比唔到枱佢地啦，

叫芳芳幫佢地攞定蛋撻仔先，唔攞定真係會無得食！

叫咗第一輪點心，想食果ｄ都食唔到，不過有得食都好彩喇，

SaSa都不知食得幾開心，祥少話食得差不多，要去B仔記球場練射籃，

都唔知有乜好練，班後生仔都唔練，你ｄ老將練得咁辛苦為乜？！

Ken哥好似唔夠皮，仲想叫個炒飯食，我地齊話唔好預我，搞到佢都唔敢叫！

最後都要講句

多謝

NatNat!

年尾午飯@又係金源小館

2008年12月31日星期三

2008年最後一日喇，Ken哥話要同我地姊妹們去食餐好，當然係AA制啦！

上次祥少帶過我去食，覺得呢度唔錯，姊妹們又話好想試，所以決定去金源喇！

Ken哥，文迪，芳芳，SaSa，Coey & 卡旻ｅ，點解得咁少人，

因為好多人都放咗假囉，所以得番我地6個囉！

今次唔食手撕雞，試吓隻炸雞，都係手撕雞好食ｄ，其他小菜都係好好味，

最重要係海底椰南瓜露加湯丸

有Ken哥同我地食飯係最開心！

五隻嘩鬼@雲泉仙館

我唔係停Blog，只不過一月份係我最忙的月份，又要出"社情"，又要出"職業博覽"，又要出"人間熱線周年報告"，全部都話要農曆年前做好喎！幾乎屎尿都唔得閒去痾呀！就大家見諒呀！

2008年12月14日星期日

媽子話呢期雲泉有菊花展，見今年新年無去到食齋（我地好多時農曆年都會去果度食吓齋），所以就約吓細佬妹有無興趣喇！

個個都話好好好，淨係得老豆同強少要開工去唔到！

呢度ｄ齋菜都唔錯嫁，其實我地最鍾意都係ｄ白粥，又滑又綿，

最重要係任食，掛住食唔記得影相！（每款都係$65)

食飽飽就去睇菊花喇！今期條龍好勁呀，仲有隻鳳呀，隻翅仲會郁郁下！

嚇人的花仙子，柏晞見到掉頭走！

荷花池無荷花，只得凋謝了的荷葉，突然發現釣魚翁，

我亦給他發現，只影得一張相！

表妹你去咗邊呀，快ｄ過嚟一齊影相啦！

見到石雕發晒癲，係都要同'隆隆'影相！

影這個最搞笑，用了4部相機都影唔齊5隻嘩鬼的樣子！

實有一個唔聽駛！

每年一度@花鳥蟲魚展

2008年12月28日星期日

今日姑姐&姑丈唔使湊孫，所以入嚟上水搵老豆飲早茶，

我見都兩個月無見過兩位老人家，

一於跟埋去歎茶，約咗十點鐘，老豆負責搵位（佢識得人嘛），

我好準時呀，不過姑姐&姑丈最勁，九點鐘就入到嚟，

佢地驚我未醒，所以都十點先到茶樓找我地！

期間姑姐講咗好多佢地細個果陣ｄ生活趣事（老豆好少講）！

笑到我肚痛，原來老豆咁鬼奀皮！不過就好有義氣！

唔知係咪年紀大就會喜歡懷舊呢？

飲到十二點零鐘，姑姐&姑丈話去粉嶺參觀"花鳥蟲魚展"，

反正我又得閒所以跟埋佢地去喇！

今年比往年的沒有太多東西好看，可能禽流感關係，少了"鳥"的部分，

"花"亦沒有什麼特別可觀，"蟲"亦是往年的東西，本人覺得較為特別的，

是"魚"的部分，"神州七號"你見過未？

怪怪的大魚，有點像中華鱘！

深圳半天遊@點解會去大漁呀?

2008年12月27日星期六

Resena上兩星期打電話比我, 佢上深圳做野過關果陣見到有個鐵板燒廣告好吸引,

話帶我地(6個姊妹)上深圳試新野, 點知得我 & Amy得閒,

無所謂啦, 任食都係要比咁多錢, 三個就三個啦(不嬲都好難約齊人)!

約咗三點鐘上水港鐵站等, 過關再搭深圳地鐵!

點知個傻婆話無抄低地址, 過到深圳先再睇番個廣告喎!

比佢激鬼死, 出到深圳, 人家個廣告牌已經換咗第二樣喇!

Amy一心想試鐵板燒嘛, 無辦法啦, 為有去我地去過嘅"大漁"囉!

先到老街站(東門) Shopping, Resena帶咗我地去太陽廣場,

衫褲鞋襪無樣啱(因為好貴呀), 為有上頂樓書城行吓啦,

雖然幾蚊本, 咁都用咗我成舊水, 買咗d學習書比d姪甥睇喇!

(記得帶環保袋上去呀, 佢地d紙咁薄嘅膠袋要收錢嫁)

行到五點左右, 係時候過科學館站喇, 因為我地無訂位, 驚住無位呀,

五點半去到, 好彩無乜人(六點鐘就坐滿晒人, 好恐怖呀!),

我地得三個人, 一定唔會比房我地, 我地又無訂位,

所以安排我地坐大廳, 無得對住個鐵板, 真係好唔妥咁,

Order咗d野又亂晒龍, Order咗三四次都無得食, 有d燒烤食品仲有D凍!

足足食咗三粒鐘, 今次又唔覺得油膩喎, 唔通上次果個師父仔未學滿師?!

途經島之吉, 見到d賀年飾物又平又靚, 忍唔住又買咗幾樣喇!

米奇花燈RMB12.8(我估係上年貨尾, 所以咁平)

吉祥魚 & 發財魚各RMB2.8(手工都唔只啦)

行行吓見到d紙巾又幾靚喎, 又唔係貴, 又買埋!

Winnie the Pooh RMB5.2, 公主&米奇各RMB5.8