網頁

2009年6月29日 星期一

勞動節@深圳品村日本料理

2009年5月1 日星期五


 





今日Resena又約我地上深圳食野喎! 問佢有乜好介紹, 佢就話萬象城對面有間叫品村日本料理, 又係任食放題, 我叫佢今次記得打電話訂位, 唔好好似上次咁樣, 去到先慢慢搵呀!


本來約六個人, 點知又得返四個, Liz仲話要上去深圳辦貨, 食飯先至Join我地, 所以又係得返我, Resena & Amy, 咁我地就約去書城行吓街先喇! 跟住再約好食晚飯!


因為未試過係落馬洲呢邊搭深圳地鐵, 咁我地要去果間書城又近落馬洲, 所以就決定搭落馬洲線喇!





影咗相先知原來係入境大堂係唔可以影相呀!


好彩當時無用閃光燈, 無比公安發現, 否則都唔知點算好呀!



深圳書城中心城就係少年宮站D出口



這個書城超大, 行咗成兩粒鐘都係兒童書角落!




行完書城都係時候去食野喇, 再坐地鐵去大劇院站萬象城出口就到品村日本料理



五點幾去到, 又話我地無訂位, 問Resena先知, 佢話訂位果陣, 果位小姐話如果五點半前嚟攞位係唔使訂位, 但偽嚟到又唔係咁講, 咁我地幾時先有位呀?


如果食鐵板加日本料理(RMB148)就要等到七點先有位, 但加多廿蚊食埋西餐就可以即刻有位, 咁即係無得揀啦, 我地一場嚟到唔通唔食咩, 又無理由等到七點先食呀!


好彩西餐部分食品都唔錯, 尤其是果木燒牛柳超正!



魚翅酥皮海鮮湯, 部長推介!都係好介紹, 好彩得半碗, 唔係就飽咗一半喇!



呢個果木燒牛柳, 真係Very Good! 我地第一次叫果碟只有兩件, 我地明明四個人, 都唔明點解比得兩件, 唔通我地普通話真係普通得滯, 所以出現這狀況? 後來開始人多, 出菜又慢, 我地向經理投訴後, 出菜快咗, 份量都正常番!



九孔鮑, 正!


 



刺身都算新鮮, 但甜蝦要了三次才出現!



 



 


深圳品村日本料理
http://www.sznama.com.cn/home.asp
地址:深圳市羅湖區寶安南路,都市名园。即萬象城地下停車場 對面
地鐵 大劇院站 C 出口 上萬象城
Tel :   86 - 0755 - 88839718


深圳书城中心城
地 址:深圳市福田区福中一路,北邻莲花山,南接市民中心(地铁四号线少年宫站)
邮 编:518026
电 话:0755—82893888;0755—23992011;0755—23992018
网站:
http://www.szbookmall.com/


2009年6月27日 星期六

太平清醮 @ 平安包

2009年4月29日星期三


 


長洲太平清醮是長洲一年一度的的大型活動,自從NatNat搬入長洲之後,開始買平安包及飾物比我地,平安包有幾種味道,我最愛都係蓮蓉味,又香又甜。


 



舊年已經收咗靚靚平安包電話繩,NatNat仲送埋比我兩個細妹添,不過我大細妹就唔見咗,為有叫NatNat再買過啦,好彩NatNat咁好人,今日就收到貨喇!



不過大細妹唔夠一個月又整唔見咗喇!真係比佢激鬼死!


2009年6月24日 星期三

和合石拜山 @ 邪邪邪

2009年4月26日星期日


 



 


每年清明或重陽,老豆都會約埋佢d兄弟姊妹去拜佢阿爺&父母,咁我地係佢仔女,緊係都要跟埋去拜吓我太爺&阿爺阿嫲啦!


但係就唔會揀正日去囉,因為太爺&阿爺阿嫲個墓地都好遠,係浩園後面山上,我地都會揸車上山,加上正日&前後兩三個星期日政府都會實施封路,所以我地通常都會遲d先去拜山!


我地諗住封路會遲d去,人家都會諗到此一著,所以都係搞到大塞車,所以都唔明政府封路嚟做乜?


約咗親戚們九點半係我屋企樓下出發,五架車浩浩蕩蕩駛去和合石,點知車龍已去到林村迥旋處附近,真大獲!


 



 


十點半終於入到和合石入口,依然龜速行駛,大家都等到發吽豆,突然浩倫有所發現!


浩倫:BaPa你睇吓對面坑渠有舊野郁郁吓呀!(紅圈位置


堅爺:邊度呀?


Ruby:有乜野呀?


卡旻e:邊度郁呀?唔係咁邪呀!


芍曈:我又要睇!



卡旻e:還定依家條車龍郁都唔郁,細佬你攞部相機去睇吓係乜嚟,影低比我地睇啦!


堅爺:好!你地等我影比你地睇啦!


好心急呀!我地係車睇到堅爺表情好古怪又尷尬,究竟郁郁吓果舊野係乜東東?


 



 



 



 



 




 


邪!邪!邪!


原來係青蛙交配呀!


 


 



 


最搞野係,跟係我地車尾d人(其他親戚),個個都好奇我地做乜要落車影相,去到山上第一件事唔係拜山,係問我地攞相睇,個個睇完就---啋!啋!啋!


图片56


拜完山,我地就去咗雲泉仙館食齋喇!


2009年6月23日 星期二

日式放題 @ 金滿家

2009年4月24日星期五



文迪呢個月痴咗線,成鬼日話要食日本野,佢話係網上搵到間超抵食日式放題喎,問吓班姊妹有無興趣啦,點知成個禮拜都無人采佢,搞到佢鬼咁唔開心,我見佢好似想死咁樣,我就話,不如今晚同你去喇,佢當堂醒晒,即刻打電話比強哥,話佢知終於去得成金滿家喇!


 



星期一至四HK$118,星期五六日及公眾假期HK$128,另加10%,再加HK$10可以任飲汽水,價錢方面又真係幾抵喎!



睇吓食物方面又如何?



大致上都唔錯喎,魚生幾新鮮,炸物都OK,尤其是天婦羅蝦好正,雞軟骨都好正,燒物亦食得過,七味雞翼價得推介!



已經食到好飽果陣,文迪先話好想食牡丹蝦&炸三文魚皮,佢話網上都話正,雖然要另收費,我地都決定去馬!


HK$50三隻牡丹蝦,咁嘅價錢都算OK啦,唔可以同北海道比嘛!


HK$10炸三文魚皮,呢個就麻麻喇,炸得唔夠脆,而且有d油淋淋囉!


 


金滿家日式放題專門店
九龍紅磡黃埔新村德民街31號地舖D室
2724 1388


2009年6月22日 星期一

與他第一次約會 @ 楊俊文

2009年4月23日星期四



 


終於有機會喇!足足等咗三個月先至見到他,心情好興奮呀!



俊文,其實係你年初二出世果日,卡旻e已經約好KYe去探你呀!


不過你媽咪唔準呀!佢話自己好樣衰唔比我地嚟探你呀!


 



你好似你嗲D呀!眼仔碌碌,好可愛呀,好彩你唔似你媽咪呀!


HEHE!


 



睇吓KYe D傑作啦!



俊文,卡旻e祝你快高長大!身體健康!聰明伶俐!


記得要做個孝順仔呀!



糧尾有人請食Lunch @ YUYU SUSHI

2009年4月17日星期五


NONOpanda23


 


又到糧尾喇!


平時一齊LUNCH飯局班友仔放咗假,


得返我同文迪去食LUNCH!



文迪:好想食日本野呀!


卡旻e:大姐,糧尾呀,點陪你食日本野呀!


文迪:我真係好想食呀,好耐無食過喇!


卡旻e:無錢呀!食第二樣啦!


文迪:咁你話食乜喇!


卡旻e:咁又唔知食乜好喎!


文迪:咁食啦!食日本野啦!


卡旻e:怕你喇,食就食啦,你簽咭,六十日還款呀!


文迪:好野!咁去邊間食呀?浦和?


卡旻e:唔知係咪換咗廚師呀,上個禮拜祥少請我食,都唔好食!


文迪:大手町?


卡旻e:迫到死,唔好!不如去YUYU喇,你又未去過!


文迪:好呀!



食SET例牌,先送每位兩件三文魚壽司



再嚟沙律



大蜆味噌湯



文迪要咗魚生飯



我上次食過魚生飯,所以今次試吓日式咖喱吉列豬扒飯



YUMMY!


食飽飽,埋單找數,文迪話今餐佢請,我緊係LUR飯應啦!


NONOpanda98


 


P.S. 今日驚喜唔此有文迪請食LUNCH,入到YUYU坐低就見到同TEAM 同事E同十二樓班姐仔食LUNCH,返到公司,收到金水MSN話我知佢又係去YUYU食,仲要係同我老細食呀!真係又會咁鬼啱,唔通呢度變咗係公司飯堂?