網頁

2009年5月16日 星期六

台北捷運之旅 Day 2 @ 士林夜市

2009年3月28日星期六


图片5


醫肚!食在士林夜市


图片22


由十分返回瑞芳大概7點3,拿拿林走上月台補票處買票返台北啦,我地Check過7點半左右應該有車返台北,點知原來唔係月台補票處買呀!月台長叫我地返落下面買,對住部自動售買機搞咗一大輪都搞唔掂,我地又無咁多散子喎,好彩咁啱有對情侶買緊飛,我地就問佢無散子點算好,佢就叫我地上返車站大堂買都可以喎!唉!我地經過大堂都唔知原來可以係呢度可以買到飛,點解一d指示都無呀!激鬼死我地呀!時間緊迫,我同文迪就以9秒9唬上大堂買飛喇!今次可以到"自強"車呀,舒服快捷,仲可以瞓番9個字呀!如果坐番嚟果陣架"區間車"就好難瞓得舒服喇,除咗SaSa!HEHE!

图片24


上咗車我地見到有四個靚位就拿拿林坐低啦,過咗一陣就有一班人揸住張飛好似搵位咁,我心諗有位就坐啦,仲要左揀右揀搞乜鬼呀?跟住問文迪攞張飛睇睇先知原來有編位呀!咁我就先去睇睇我地原本個坐位係邊先,已經比兩個阿毛同一個一伯坐咗,佢地問我係咪坐咗我個位,我話係呀,佢地就執埋包袱走咗喇,我就返去搵返文迪佢地啦,匯報咗頭先情況,決定去返我地正確位置,費事一陣比人趕走就瘀皮啦!

图片18



瞓咗一陣就已經到咗台北車站喇,跟著我地就過返去捷運台北站到劍潭站的士林夜市食晚餐喇!去到劍潭站差不多8點9喇,雨繼續落,話大唔大,話細又唔係細喎,想唔開傘又唔得,真係麻鬼煩!但士林夜市都係人山人海!



我好鐘意食蔥油餅,本來想去試街邊檔果間,最衰落雨,為有試呢間啦,完全唔掂呀!(此舖就在好好味的協力旺香雞排對面)


係呢度發現有阿Nat要我一定買比佢嘅"櫻花蝦豬肉紙",咁都好,唔使我地專登去搵阿蘇介紹果間,因為唔順路嘛!我地同老闆講價,買五送一得唔得,佢拎晒頭,跟住話買十送一就可以,好!就要十一盒啦!(都唔係好明?明明賣豬肉紙,點解舖名要叫"牛媽媽"喎!?



图片30
都唔明點解嚟親士林就必定要食蚵仔煎&炒花枝,兩樣我都唔係好啱食,潮州蠔仔餅好食好多!花枝又唔夠味,兩樣仲要鬼死咁多芡汁喎!NO GOOD!


 



图片9
係人都知士林最出名有大大大雞排,我地見到咁多人排隊都廢事采佢,好彩比我地見到有第二間賣香雞排,文迪話雖然無果間大雞排咁大件,但就好食好多(因為我無食過果間大大大雞排,唔知係乜味囉!)同埋果間好鬼衰,唔會幫你分開幾件囉,有時太出名係巴閉d啦,唔憂做嘛!我地邊食邊讚老闆娘做得好好味,可能遊人見我地食得咁開心又滋味,開始越來越多人幫襯,跟住老闆娘叫我地試埋鹹酥雞,我地話太多,如果可以要半份就會試囉,老闆娘諗咗陣,笑笑口話OK無問題,鹹酥雞都唔錯,不過都係雞排好味d!


 



图片9
食咗熱氣野,緊係要飲杯野清清熱啦!隔離就有間果汁店,雖然我唔鐘意食苦瓜,但係都要飲番杯台灣至出名嘅蜂蜜白苦瓜汁啦!飲咗一啖好鬼苦,要老闆再加d蜂蜜,呢個老闆又好好人喎,咁就好飲好多喇!



图片9
大腸包小腸究竟係乜傢伙?認得個女人呀!又係"食尚玩家"介紹過呀!原來係糯米腸包住豬肉腸!又係一間串舖-"一律不切",下次嚟要自己帶把刀先得呀!味道無乜特別,糯米腸油淋淋,淨係豬肉腸好食d!


 



图片19
七里香又係乜?真係幾香喎,出發前同文迪講過,一定要試七里香!原來係雞PatPat,燒香咗又幾好食喎!死喇,有點兒愛上她!


 



图片10
食到咁上下,我地就去咗附近商舖行陣街,雨繼續落不停,又要攞咗送比阿Natd手信,真係麻鬼煩!行到差不多十一點,又係時候食甜品宵夜喇,文迪介紹我地去食"阿忠冰店",叫咗個"花生奶雪花冰"&"芒果刨冰+雪糕",超大呀,一個人肯定食唔晒,二個人食到一半都好墀利,三個人唔食其他都可能搞得掂,四個人就啱啱好,不過我地叫咗兩款呀,無可能食得晒囉!一絲絲,軟綿綿又幾好食喎!


图片38
食食吓有個帥哥走埋嚟叫我地幫佢簽個名支持,我起初以為佢係d乜乜議員拉票,我地香港人喎,點支持你呀?佢仲話無問題喎!我望吓佢就發現佢身上有條用紅色紙整嘅帶子,帶子寫下"競選台灣型男",雖然帥哥唔係好型,不過我地四個就畫隻龜支持吓佢啦,佢都唔知幾開心呀!叫佢同SaSa影張相都話無問題呀!我估佢緊係做"戥穿石"比人玩啦!


图片12
士林夜市開始人流少咗好多,我就問文迪,捷運尾班車幾點呀?大家才醒覺都好夜喇,即刻問吓靚姐知唔知幾點啦,佢以為我地問夜市收幾點喎,比佢激死,跟住佢話收11:45-12:00左右,我地睇睇錶,原來已經11:35喇,嚇得我地拿拿林埋單走人啦!好彩趕得切!返到酒店梳洗完都已經點幾鐘,但係我同SaSa又掛住睇台灣綜藝節目,睇到成3點都未瞓!嘩!唔得喇,聽日仲要去小人國嘛,勒令SaSa瞓覺!


图片20


Day 2 END!


下一站:小人國主題樂園

图片21



士林夜市


劍潭站1號出口


http://1112.travel-web.com.tw/


2009年5月13日 星期三

台北捷運之旅 Day 2 @ 平溪線半日遊 Part III 十分

2009年3月28日星期六


 



图片36
Part III 十分


按圖放大



最後在平溪搭 16點29分 的火車前往十分站,約 16點41分就到站喇!十分比平溪還要小一點,但遊人亦不小啊!商舖就在火車鐵軌的兩旁,過對面商舖時記得注意火車到站未呀!



在這裡亦有木製的明信片,"龍貓公車站"乜原來係呢度咩?

图片27



我地沿著路軌行到差不多十五分鐘就搵到我地要幫襯放天燈的「阿媽天燈」,在店門口有放一塊介紹「阿媽天燈」由來的小牌子,有中文、日文&英文,可見她的生意做得很成功,觀光客很捧場啊!


图片17



我地起初以為天燈唔同顏色有唔同意思,阿媽話無分別,最緊要係放得高喎!咁我地就分別揀唔同顏色,睇吓邊種係最亮最靚先至得!我記得細個果陣都有睇過放孔明燈,每年八月十五,村內d哥哥就會去放,當時淨係得白色,放到上天時好明亮呀!事隔多年可以自己親手放,好興奮呀!


图片18



我提議揀淺色的會明亮點,因為細個都係見得白色放上天嘛!各自揀咗心水顏色,寫上心願,就由阿媽帶領我地去放天燈喇!阿媽雖然七八十歲,身體亦好好,放天燈無難度!


图片8




看著一盞盞的天燈亮起 帶著每個人的希望飛上天去


那種期待夢想與幸福能夠成真的心情


剎那間 讓我們感覺到 幸福 真的來了



文迪的橙色天燈係最靚呀!放完天燈又係時候回市區,諗諗今晚晚餐食乜好,等車期間諗住買盒天燈餅食住先,點知賣鬼晒喎,商議後決定到士林醫肚!



下一站:士林夜市


图片23


其實十分仲有好多觀光點(十分瀑布、靜安吊橋、眼鏡洞瀑布、大華壺穴、台灣煤礦博物館),因為天雨、時間令我地只能放天燈!


十分!有機會我一定會再嚟探你呀!

图片37


 


阿媽の天燈(NT$120)


地址:台北縣平溪鄉十分街109號


電話:(02) 2495-8422


網址:http://yangesther.tripod.com/


2009年5月8日 星期五

台北捷運之旅 Day 2 @ 平溪線半日遊 Part II 平溪

2009年3月28日星期六


 



 


图片3
Part II 平溪


按圖放大


從菁桐搭小火車往下一站平溪,大概4-5分鐘就到了。本來文迪話從菁桐步行到平溪只需20分鐘左右就可以到平溪,如果唔係天雨路滑,我地一定會試吓,順道欣賞沿途風景嘛!



平溪與十分都是放天燈的好地方,連個渠蓋都係用天燈標示就知啦!我好祈待去放天燈呀!



原來食尚玩家都到此一遊,噚晚食果餐399食到飽都係佢地介紹,我地緊係又要試吓呢個啦!我叫的是海鮮爆漿酥堡,理應餡料係海鮮嘛,但係我地食到有雞肉囉,唔通個姐姐仔比錯我地,呢個酥堡就麻麻地,反而杯黑豆漿又幾好飲喎!另外再要咗香腸,佢地話都係九份果度好食喎!



跟住就嚟到呢間平溪畫坊,佢地將自己畫嘅水墨畫印成明信片,強哥又話要寄張比契女,SaSa又話要寄番張先得喎,真你去到邊寄到邊!寄完信就去下一站十分喇!係呢度又係逗留咗差不多一粒鐘!



下一站:十分


图片3